कात्तिक १३
हाल चीनको भ्रमणमा रहेका भट्टराईलाई ग्वान्जाउबाट हङकङसम्म रेलमा यात्रा गर्दा अपमान गरिएको भट्टराईले सामाजिक सञ्जाल फेसबुकमार्फत शनिबार साँझ बताएका हुन् । भट्टराईले सामाजिक संजालमा भनेका छन् ‘ग्वान्जाऊबाट हङकङसम्म रेलमा यात्रा गर्दा महात्मा गान्धीको दक्षिण अफ्रिका यात्राको दु:खद सम्झना भयो । सामान्य यात्रीको रूपमा नेपाली पासपोर्टको विदेशमा कति अपमान हुँदोरहेछ, भन्ने प्रत्यक्ष अनुभूति भयो ।’
उनले नेपाल आर्थिक रुपमा पछि परेकै कारण नेपालीमाथि अपमान भएको ठोकुवा गर्दै भनेका छन्, ‘यस घटनाबाट आर्थिक रूपले समृद्ध नबनेसम्म नेपालीको सम्मान विदेशमा रहन्न र त्यसका निम्ति आर्थिक विकासलाई अर्जुनदृष्टि लगाएर नयाँ शक्ति अभियानमा अरू दृढतापूर्वक लाग्नुपर्छ भन्ने अठोट झन् बढेको छ ।
भट्टराई २१ औं शताब्दीको सामुन्द्रिक सिल्क रोड प्रदर्शनमा सहभागी बुधबार चीन पुगेका थिए । भट्टराईसँगै उनकी पत्नी हिसिला यमी पनि चीन भ्रमणमा सामेल छिन् । भट्टराईलाई १ घण्टा हङकङस्थित अध्यागमनले नियन्त्रणमा लिएको थियो । सरकारले रातो पासपोर्ट दिएपनि भट्टराई हरियो पासपोर्ट बोकेर त्यहाँ गएका थिए, हरियो पासपोर्ट देखेपछी हङकङ अध्यागमनका अधिकारीहरुले भट्टराई सहित तीनै जनालाई अर्को कोठातिर इशारा गर्यो । तर अध्यागमनका अधिकारीहरुले उनलाई पिपुल इन कस्टडी/पिपुल अण्डर इन्भेष्टिगेशनमा लगेर राखेपछि भट्टराईले आफु अपमानित भएको महशुस गरेको बताएका छन् ।
झन्डै एक घण्टा त्यहाँ बसेका भट्टराईलाई पछी अध्यागमनका अधिकारीहरुले सरी मात्र भनेको तर, के गल्ती भयो भन्दा केही नबोलेको बताए ।
