बुटवल, असोज १८ -नेपाल–भारत सिमानाको बेलहिया नाकामा प्रहरी र संयुक्त लोकतान्त्रिक मधेसी मोर्चाका कार्यकर्ताबीच झडप भएको छ । मधेसी मोर्चाका कार्यकर्ताले नाराबाजी गर्दै प्रहरीमाथि भारतीय भूमिबाट ढुङ्गा प्रहार गरेका छन् ।
आन्दोलनकारीले गुलेलीमा गुच्चा राखेर भारतीय भूमिबाट प्रहरीतर्फ प्रहार गर्दा प्रहरी नायब उपरीक्षक रामेश्वर कार्कीसहित दशजना प्रहरी घाइते भएका छन् ।
मधेसी मोर्चाका कार्यकर्ता नाराबाजी गर्दै भारततर्फ लागेका छन् भने दुई–तीनजना आन्दोलनकारीलाई प्रहरीले पक्रेको छ । केही दिनयता अवरोध हटेको बेलहिया नाकामा आइतबारदेखि मोर्चाले फेरि अवरोध सिर्जना गरेको छ ।
