काठमाडौं : एमालेका बरिष्ठ नेता माधवकुमार नेपालले दलहरुबीच संविधान निर्माणका लागि सहमति प्रयास जारी रहेको बताएका छन् । शनिबार विहान सिंहदरबारमा बसेको तीन दलको बैठकपछि सञ्चारकर्मीहरुसँग बोल्दै नेता नेपालले माघ ८ गते संविधान जारी गर्ने गरी सहमति कायम गर्ने पहल भइरहेको बताएका हुन् ।‘तोकिएको मितिभित्रै संविधान जारी गर्न दलहरुबीच सहमति हुन्छ’, नेता नेपालले भने, ‘दुनियाँले खोजेजस्तो सहमतिका लागि अझै केही दिन लाग्न सक्छ ।’
ठूला नेतामा संविधान निर्माणको इच्छाशक्ति छैन : देवकोटा
एकीकृत माओवादीका नेता खिमलाल देवकोटाले संविधान निर्माणका लागि नीन ठूला दलका ठूला नेतामा इच्छाशक्ति नै नभएको आरोप लगाएका छन् ।
शनिबार सिंहदरबारमा सञ्चारकर्मीहरुसँग कुरा गर्दै नेता देवकोटाले विषयको टुंगो गरी समयको ख्याल गर्दै नेताहरुले इच्छाशक्ति देखाउन सकेमा माघ ८ मै संविधान जारी हुने दाबी गरे ।
‘नेताहरुको इच्छाशक्ति नहुँदा संविधानका विवादित विषयमा सहमति जुट्न ढिलाई भएको हो’, नेता देवकोटाले भने, ‘अब वार्तामा बस्नुअघि एजेन्डाको मोडालिटी तयार गर्नु जरुरी भइसक्यो, अनिमात्रै वार्तामा सहमति हुनसक्छ ।’
Source :- aanapurna post
