श्रीकृष्ण सिग्देल।
स्याङ्जा।मंगलबार बेलुका देखि परेको अविरल बर्षका कारण स्याङ्जामा करोडौको क्षती पुर्याएको अनुमान गरिएको छ । वाढी पहिरो, चट्याङ् र आँधिखोलाले बगाएर तिनजनाको मृत्यु भएको छ भने चार जना घाइते भएको समाचार प्राप्त भएको छ।
आँधीखोलामा आएको वाढीले घर सहित वगाउदा वालिङ नगरपालिका वाड नं ९ मा भाडाको घरमा वस्ने रोल्पा घर भएकी हस्तकुमारी वुढा मगरलाई वगाएर बेपत्ता पारेको छ भने उनका छोरा बुहारी भने बाँच्न सफल भएका छन् । पुतलीबजार नगरपालिका वाड नं ९ स्थित आमडाँडामा भद्रबहादुर शाहाको घर पहिरोले घर पुरिदा उनकी छोरी १२ वर्षिया वालिका उर्मिला शाहको मृत्यू भएको छ भने अन्य घाइते भएको जिल्ला प्रहरी कार्यालय स्याङ्जाले जनाएको छ । मग्याम चिसापानी गाविस वाड नं ६ मा चट्याङमा परेर एक जना ४५ वर्षिय महिला दिलमाया गुरुङको मृत्यू भएको प्रहरीले जनाएको छ । जिल्लामा वाढीका कारण भएको क्षतिको पूर्ण विवरण आउन वाँकी रहेको समेत प्रहरीले जनाएको छ । जिल्ला प्रहरी कार्यालय स्याङ्जाले प्रहरी निरिक्षकको नेतृत्वमा उद्धार टोली ठाँउ ठाँउमा खटाएको जनाएको छ ।
आँधीखोलामा आएको वाढीका कारण वालिङ नगरपालिका वाड नं ३ मा रहेको पतञ्जली योगपिठको भवनमा क्षति पुर्याएको छ । भवन जोखिममा परेको छ । सयौं हेक्टर जमिनमा रहेको धानखेती नष्ट भएको छ भने नदी किनारमा रहेका दुइवटा कुखुराको फर्म बगाएको छ । वालिङ नगरपालिका वाड नं ८ स्थित हरितज्योति कृषि फर्ममा वाढी पसेपछि लाखौ रुपैयाको माछा तथा तरकारी वगाएको छ । बयरघारीमा रहेको बंगुर र कुखुरा फर्म पनि आँधीखोलाले बगाएर क्षती पुर्याएको छ । वाढीका कारण आँधीखोलामा निर्माण गरिएका ५ वटा पक्की पुल जोखिममा परेका छन् । जिल्लाका अर्जुनचौपारी बजार, हेलुबजार, वयरघारी, वालिङ नगरपालिकाको भूम्रेबजार, वाँयाटारी, तल्लो गल्याङ लगायतका ठाँउहरु जोखिममा परेका छन् । जिल्लाका बिभिन्न क्षेत्रमा के कति क्षती भएको छ भन्ने समाचार आउन बाँकी रहेकाले समाचार तयार पार्ने समय सम्म क्षतीको पुरा विवरण भने आएको छैन ।
अविरल वर्षाका कारण सिद्धार्थ राजमार्गमा आएको पहिरोका कारण एक दर्जन भन्दा वढी स्थानमा सडक अवरुद्ध भएको छ । जसका कारण लामो दुरिमा चल्ने सवारी साधन अवरुद्ध भएका छन् । वाढी आउने क्रम नरोकिएकोले प्रमुख जिल्ला अधिकारीको नेतृत्वमा दैवि प्रकोप उद्दार समितिको वैठक वसेर हुन सक्ने सम्भावित खतरालाई मध्येनजर गर्दै नदी किनारका वासिन्दालाई सुरक्षित स्थान तर्फ रहन आग्रह गरिएको छ।
